Додситонии кулли Тоҷикистон қазияи Фурқат Абдуфаттоев, сокини ҷамоати Ворухи Исфараро, ки бо дархости ҷониби Қирғизистон дар Русия дастгир шуда, дертар раҳо гардид, дорои "ангезаи сиёсӣ" донист.

Абдуфаттоеви 45-соларо моҳи феврали имсол боздошт ва 6-уми июл бо шарти берун нарафтан аз маҳалли зист озод карданд. Қарори ниҳоии додгоҳ дар мавриди сарнавишти ӯ моҳи августи имсол эълон хоҳад шуд.

Чанд нафар дар шабакаҳои иҷтимоӣ раҳоии Абдуфаттоевро дар Русия натиҷаи "муборизаи дастҷамъона" дониста, аммо аз Додситонии кул ном набурда буданд. Дафтари матбуоти Додситонии кулли Тоҷикистон рӯзи 8-уми июл гуфт, ду дафъа аз ҳабс озод намудани Абдуфаттоевро дархост карда буд. Ба иттилои манбаъ, онҳо ба Додситонии кулли Русия рӯзҳои 11 ва 13-уми феврали соли 2021 "дархости асоснок" фиристоданд.

Давлат Сафаров, сардори шуъбаи тафтишотӣ дар Додситонии вилояти Суғд, дар моҳи феврали имсол гуфта буд, ки "Додситонии ҳарбии гарнизони Суғд маълумоти заруриро ба Русия фиристод ва айни замон масъалаи озод кардани шаҳрванди Тоҷикистон баррасӣ мешавад."

Ҷониби Қирғизистон Фурқат Абдуфаттоевро "барои ташкили бетартибиҳои оммавӣ ва авбошӣ дар минтақаи номуайни марз байни вилояти Суғд ва ноҳияи Бодканд" муттаҳам карданд. Худи Фурқат Абдуфаттоев ва наздиконаш ҳарду иттиҳомро намепазиранд ва мегӯянд, ӯ дар ягон низои сарҳадӣ ширкат накардааст.

Қирғизистон пас аз муноқишаҳои марзӣ аз таҷрибаи дар ғайбашон айбдор ва зери пайгарди байналмилалӣ қарор додани шаҳрвандони Тоҷикистон кор мегирад. Дар панҷ моҳи охир бори дуюм аст, ки сокинони Ворух бо дархости Қирғизистон дар Русия боздошт мешаванд. Қаблан Диловар Ҷӯраев, сокини дигари Ворух, ҳам дар Русия дастгир шуда буд.

Дар ҳамин ҳол, Тоҷикистон ҳам баъзе аз шаҳрвандони кишвари ҳамсояро, ки дар барангехтани низоъҳои марзӣ айбдор медонад, зери пайгард қарор додааст.

Бахши қирғизии Радиои Озодӣ хабар дод, ки мақомоти Русия рӯзи 18-уми апрел Эсанбой Маҷидов (Мажитов) сокини деҳаи Кук-Тош, ҳаммарз бо Хоҷаи Аълои Тоҷикистонро дар шаҳри Нижний Новгород боздошт карданд. Ҷониби Тоҷикистон дархоcт кардааст, ки ӯ барои муҳокима ба Тоҷикистон таслим карда шавад.

Тоҷикистону Қирғизистон беш аз 976 километр марз доранд, вале ҳалношуда мондани мақоми 504 километр сарҳад солҳо боз ба яке аз мушкили ҷиддии миёни ду ҳамсоя табдил шудааст. Аз ҷумла, дар муноқишаи рӯзҳои 28-29-уми апрели имсол аз ду ҷониб даҳҳо нафар кушта ва садҳо каси дигар захмӣ шуданд.

Никушор Дан, шаҳрдори Бухарест дар даври дуюми интихоботи президентии Руминия пирӯз шуд. Овоздиҳӣ рӯзи 18-уми май баргузор шуд.

Ба гузориши бахши руминии Радиои Озодӣ, Дан 54 дарсади овозҳоро соҳиб шудааст. Ба тарафдории рақиби ӯ сиёсатмадори ростгаро Ҷорҷ Симион 46 дарсади овоздиҳандаҳо раъй доданд.

Никушор Данро сиёсатмадори аврупогаро меноманд.

Ҷорҷ Симион шикасти худро дар интихобот қабул карда, рақибашро ба ғалаба табрик гуфтааст.

Даври аввали интихоботи президентӣ дар кишвари аврупоии Руминия 4-уми май баргузор шуда буд. Дар даври аввал Симион 40,5 ва Никушор Дан 21 дарсади овозҳоро соҳиб шуданд.

Муҳоҷире, ки дар шаҳри Екатеренбурги Русия се кӯдакро аз коми оташ наҷот дод, шаҳрванди Тоҷикистон будааст. Намояндагии Вазорати меҳнат ва муҳоҷирати Тоҷикистон дар Русия мегӯяд, ин фард Сайвалӣ Шарифов мебошад.

Ба қавли манбаъ, Шарифов бегоҳи 14-уми май вақти ба дорухона рафтан шоҳиди сӯхтор дар ошёнаи якуми биное шуд.

Сайвалӣ Шарифов гуфтааст, “садои фиғони кӯдаки хӯрдсолро шунида,” ба кӯмаки онҳо шитофт. Ин муҳоҷири тоҷик аввал як кӯдакро наҷот медиҳад ва баъд мефаҳмад, ки дар дохили хонае, ки оташ гирифтааст, боз ду кӯдаки дигар аст. Шарифов ду маротибаи дигар худро ба даруни оташ партофта, кӯдакони боқимондаро наҷот додааст.

Баъзе расонаҳои маҳаллии Екатеренбург аз ин амали Сайвалӣ Шарифов ситоиш кардаанд. Шарифов 32-сол дошта, 16 соли ахир ҳамчун боркашон кор мекардааст. Худи ӯ дар суҳбат бо намояндагони Вазорати меҳнат ва муҳоҷират гуфтааст, наҷоти кӯдаконро барои худ қарз медонист «ва ҳар касе, ки дар ҷойи ман бошад ҳамин гуна рафтор мекард.»

Ин бори аввал нест, ки муҳоҷирони тоҷик дар Русия шаҳрвандони маҳаллиро аз фалокат наҷот медиҳанд. Азҷумла соли 2024 Муҳаммадҷон Обидов, як ҷавони тоҷик дар Маскав тифли навзодро аз дасти марди рабоянда наҷот дод. Дар бораи ин ҳодиса ва ифтитоҳи парвандаи ҷиноӣ бар асоси моддаи "кӯдакрабоӣ" Кумитаи тафтишоти Русия ҳам хабар дод, вале тоҷик будани ӯро пинҳон кард.

Соли 2020 Ҳоҷимурод Қаландаров, як ҷавони тоҷик кӯдакеро аз ғарқшавӣ наҷот дода, вале худаш ҳалок шуд.

Расонаҳои Русия дар бораи қаҳрамонии муҳоҷирон хеле кам хабар медиҳанд.

Ҷо Байден, раиси ҷумҳури пешини Амрико ба саратони простата мубтало шудааст.

Дафтари Байден рӯзи якшанбеи 18-уми май эълон кард, ки ду рӯз пеш дар пайи бурузи нишонаҳои ин беморӣ, пизишкон президенти пешинро ташхис карда, дар ӯ бемории саратонро ошкор кардаанд.

Дар баёнияи дафтари Ҷо Байден омадааст, хонаводаи президенти пешин дар бораи табобати ӯ бо пизишкон машварат доранд.

Нашри ин хабар вокунишҳои густурдае ба дунбол дошт. Доналд Трамп, раиси ҷумҳури феълии Иёлоти Муттаҳида дар шабакаи иҷтимоии худ навишт, ӯ ва ҳамсараш аз шунидани хабари бемории Ҷо Байден “бисёр мутаассир” шудаанд ва барои Байден орзуи саломатӣ мекунанд.

Ба навиштаи хабаргузории "Ройтерс", саломатии Ҷо Байден ҳатто пеш аз мунозираи ӯ мавриди таваҷҷуҳи расонаҳо қарор гирифта буд. Манзур мунозираи интихоботии Ҷо Байден ва Доналд Трамп дар моҳи июни соли 2024 аст, ки баъди он Байден аз рақобатҳои интихоботӣ даст кашид.

Ҷо Байден соли 2020 дар интихоботи президентӣ пирӯз шуда, то охири соли 2024 Амрикоро роҳбарӣ кард. Ӯ 82 сол дорад.

Тоҷикистон ва Чин ният доранд, ки дар шаҳри Душанбе барои таъмири мошинҳои барқӣ ва нобуд кардани онҳо корхонаи муштарак таъсис диҳанд. Ин мавзуъ 15-уми май дар вохӯрии вазирони нақлиёти Тоҷикистон ва Чин дар шаҳри Остона, пойтахти Қазоқистон баррасӣ шудааст.

Ба иттилои Вазорати нақлиёти Тоҷикистон, корхонаи муштарак барои хидматрасонии техникии электромобилҳо, нобудсозӣ ё коркарди батареяи мошинҳои барқӣ пешбинӣ шудааст. Аммо маълум нест, ки коргоҳи нав кай ва бо чӣ қадар сармоя сохта мешавад.

Тасмими сохтани чунин коргоҳ дар ҳолест, ки баъд аз соли 2022 аз Чин ҳазорҳо адад нақлиёти барқӣ вориди Тоҷикистон шуд. Тибқи иттилои расмӣ, танҳо давоми се моҳи имсол ба кишвар 6047 нақлиёти барқӣ ворид шудааст. То имрӯз шумораи умумии нақлиётҳои барқӣ дар кишвар 27 ҳазор будааст.

Бар асоси дастури ҳукумати Тоҷикистон, то соли 2028 бояд то 30 дарсади мошинҳо дар кишвар барқӣ ё электромобил бошанд. Аз соли 2022 ворид кардани нақлиёти барқӣ ба Тоҷикистон аз андоз ва боҷи гумрукӣ озод аст.

Баъди ин кор таваҷҷуҳ ба мошинҳои барқӣ зиёд шуд, аммо маҳдудият барқ дар минтақаҳо мушкили дигареро барои соҳибони ин нақлиётҳо ба вуҷуд овардааст.

Ҷасади Муҳаммад Синвор, яке аз роҳбарони гуруҳи "Ҳамос" дар як нақбе дар Навори Ғазза пайдо шудааст. Ин хабарро телевизиони саудии ал-Ҳадас бо такя ба манобеаш пахш кардааст.

Ба гузориши расонаҳо, ҳамроҳи Муҳаммад Синвор ҷасади чанд ёвари ӯ дар минтақаи Хон-Юнуси Ғазза ҳам пайдо шудааст. Гуфта мешавад, ки ин афрод рӯзи сешанбеи 13-уми май дар пайи ҳамлаи сангини артиши Исроил кушта шудаанд.

Телевизиони ал-Ҳадас гузориш додааст, ки ҷасади Муҳаммад Шабан, фармондеҳи гуруҳи “Рафаҳ” низ пайдо шудааст.

Гуруҳи “Ҳамос”, ки дар Амрико ва Иттиҳоди Аврупо созмони террористӣ шинохта шудааст, то ҳол ин хабарро шарҳ надодааст. Исроил низ кушта шудани Синвор ва Шабанро тасдиқ накардааст.

Рӯзи 13-уми май артиши Исроил аз зарба ба як маркази фармондеҳии "Ҳамос" дар Хон-Юнис ва дар канори беморхонаи аврупоии Ғазза хабар дод. Ба гузориши манобеи нашрияи “Таймс Исроил”, ҳадафи ин ҳамла Муҳаммад Синвор буд. Артиши Исроил дар ин бора расман чизе нагуфтааст.

Муҳаммад Синвор, бародари Яҳё Синвор, роҳбари пешини гуруҳи “Ҳамос” буд, ки моҳи октябри соли гузашта дар Ғазза кушта шуд.

Яҳё Синворро яке аз тарроҳони ҳамлаи маргбор ба Исроил дар рӯзи 7-уми октябри соли 2023 ном мебаранд. Ҷангҷӯён дар он рӯз дар ҷануби Исроил 1200 касро кушта ва беш аз дусад нафарро гаравгон гирифтанд.

Баъди ин ҳамла, Исроил дар Ғазза амалиёти густардаро оғоз кард, ки то ҳол идома дорад. Вазорати тандурустии Ғазза мегӯяд, дар натиҷаи ҳамлаҳои Исроил аз замину ҳаво зиёда аз 53 ҳазор фаластинӣ кушта шудаанд. Ин вазорат гуфтааст, ки 119 ҳазору 919 нафари дигар дар ҳамлаҳои Исроил дар Ғазза захмӣ шудаанд.

Гуфта мешавад, ки аксари қурбониён ва маҷрӯҳони ин ҳамлаҳо, занону кӯдакон мебошанд.

Субҳи 18-уми май артиши Русия бо 273 паҳпод ба Украина ҳамла кардааст.

Ба гуфтаи мақомоти Украина, дар пайи ин ҳамлаҳо як зан дар вилояти Киев ҷон бохта, се каси дигар маҷруҳ шудаанд. Ҳамаи онҳоро ба беморхона интиқол доданд.

Ба иттилои неруҳои ҳавоии Украина, аз 273 паҳпод 88 адад сарнагун шуда, 128 тои дигар "роҳгум заданд."

Дар ҳамлаи паҳподҳои русӣ асосан вилоятҳои Киев, Днепропетровский ва Донетск зарар дидаанд.

Раиси ҷумҳури Тоҷикистон мегӯяд, дар чор моҳи аввали имсол 159 корхона дар кишвар аз кор мондааст. Эмомалӣ Раҳмон 17-уми май дар ҳузури аъзои ҳукумат дар ноҳияи Данғара гуфт, имсол "дар аксари шаҳру ноҳияҳои кишвар либоси мактабӣ истеҳсол нагардидааст, ки хеле нигаронкунанда мебошад."

Президенти Тоҷикистон дар ин ҷаласа гуфт, дар моҳҳои январ-апрели имсол 121 корхонаи нави саноатӣ ба истифода дода шуда, вале 159 коргоҳ аз кор мондааст.

Аммо Эмомалӣ Раҳмон нагуфт, ки корхонаҳои муфлисшуда дар кадом бахшҳо кор мекарданд ва сабаби аз кор монданашон чист.

Пештар баъзе моликони корхонаҳо молиёт (андоз)-и баланд ва тафтишҳои зиёдро аз сабабҳои муфлисшавӣ гуфта буданд.

Тибқи омори раиси ҷумҳур, давоми чор моҳи аввали имсол истеҳсоли нахи пахта дар кишвар 10, 8 ҳазор тонна ва газворҳои пахтагин 1,3 миллион метри мураббаъ кам шудааст. Эмомалӣ Раҳмон гуфт, ин вазъ “омили асосии коҳишёбии ҳаҷми истеҳсоли маҳсулоти нассоҷӣ мебошад.”

Президент дар ин маҷлис ҳамчунин аз иҷро нашудани нақшаи кишти пахта ва картошка интиқод кард.

Норозигии раиси ҷумҳур дар ҳолест, ки баҳори имсол шикоятҳо аз маҷбур кардани деҳқонон ба кишти пахта зиёд садо дод. Деҳқонон аз чанд минтақаи Тоҷикистон, шикоят карданд, ки бо талаби мақомот дигар намуд зироатҳоро шудгор карда, ба ҷояш пахта кишт карданд.

Вазири дифои Исроил аз ҳамлаи густурдаи артиши ин кишвар ба Навори Ғазза хабар додааст. Исроил Катс, шоми 17-уми май гуфт, ҳадафи ин амалиёт озодии гаравгонҳои боқимонда, зери назорат гирифтани як қисмати Ғазза ва нобудии “Ҳамос” аст. Амрико ва Иттиҳоди Аврупо "Ҳамос"-ро гурӯҳи террористӣ медонанд.

Дар хабарномаи артиши Исроил омадааст, низомиёни ин кишвар дар шабонарӯзи ахир ҳамлаҳои ҳавоиро ба Ғазза сахттар кардааст.

Артиши Исроил асосан ба ноҳияҳои Ҷабалия, Дир ал-Балах ва Хон-Юнус зарба задааст.

Амалиёти нави низомиёни исроилӣ баъди анҷоми сафари Доналд Трамп ба Ховари Миёна оғоз шуд. Гуруҳи “Ҳамос” пешниҳоди фиристодаи вижаи Трамп дар бораи озодии 10 гаравгон бар ивази оташбаси муваққатро рад кард.

Баъди оғози амалиёти нави артиши Исроил дар Ғазза, намояндагони гуруҳи “Ҳамос” аз оғози музокироти бидуни қайду шарт дар Қатар хабар дод.

Ҷанг дар Ғазза дар ҳоле шиддат мегирад, ки коршиносони Созмони милал ҳушдор додаанд, ки бо гузашти 76 рӯз аз қатъи кӯмакҳои башардӯстона аз сӯи Исроил, хатари қаҳтии ҷиддӣ ин минтақаро таҳдид мекунад.

Президенти Амрико Доналд Трамп рӯзи душанбеи 19-уми май бо ҳамтои русаш Владимир Путин телефонӣ суҳбат мекунад. Қарор аст, роҳбарони ду кишвар дар бораи ҷанг дар Украина гап зананд.

Трамп дар шабакаи иҷтимоии худ Truth Social навиштааст, "мавзӯи гуфтугӯ қатъи "ҳаммоми хун" аст. Ҳар ҳафта зиёда аз панҷ ҳазор сарбозони Русия ва Украина кушта мешаванд."

Баъди гуфтугӯ бо Путин, қарор аст Трамп бо раиси ҷумҳури Украина Владимир Зеленский ва роҳбарони НАТО ҳам гуфтугӯ кунад.

Доналд Трамп умедворӣ кардааст, ки ба оташбас дар ҷанги Украина даст меёбанд.

Рӯзи 17-уми май Марко Рубио, котиби давлатии Амрико бо ҳамтои русаш Владимир Путин гуфтугӯ кардааст. Рубио ва Лавров гуфтугӯҳои Русия ва Украинаро дар Истанбул баррасӣ кардаанд.

Рӯзи ҷумъаи 16-уми май намояндагони Русия ва Украина дар шаҳри Истанбули Туркия ду соат гуфтугӯ карданд. Ду тараф натавонистанд дар бораи оташбаси 30-рӯза ба тавофуқ расанд. Чизе, ки Украина ва кишварҳои ғарбӣ бар он пойфишорӣ доранд. Ягона натиҷаи музокироти Истанбул табодули асирон дар қолаби "ҳазор бар ҳазор" эълон шуд.

Вазирони корҳои хориҷии Тоҷикистон ва Эрон дар бораи таҳаввулоти ахири минтақа ва ҷаҳон сӯҳбат намуда, бар зарурати ҳамкориҳои минтақавӣ дар масъалаи Афғонистон, таъкид кардаанд.

Мулоқоти Сироҷиддин Муҳриддин ва Аббос Ароқчӣ рӯзи 17 май дар ҳошияи "Чаҳордаҳумин маҷмаи гуфтугӯи Теҳрон", сурат гирифтаст. Ин ҳамоиш рӯзҳои 18-19 май дар пойтахти Эрон, баргузор мешавад.

Дафтари матбуоти Вазорати корҳои хориҷии Тоҷикистон бо нашри хабарномае навишт, ки Сироҷиддин Муҳридди ва Аббос Ароқчӣ вазъи кунунӣ ва низ дурнамои ҳамкорӣ миёни Душанбе ва Теҳронро баррасӣ кардаанд.

Аз ҷумла, ба гуфтаи манбаъ, ҷонибҳо бар тақвияти ҳамкориҳо дар арсаҳои иқтисодӣ, тиҷоратӣ, фарҳангӣ, илмӣ ва сайёҳӣ таъкид карданд.

Хабарномаи Вазорати корҳои хориҷии Тоҷикистон мегӯяд, ки дар ин мулоқот доир ба таҳаввулоти ахир дар минтақа ва ҷаҳон, табодули назар сурат гирифтааст.

Расонаҳои Эрон ҳам навиштанд, ки дар ин мулоқот аз таҳаввулоти Ховари Миёна ибрози нигаронӣ шуда, бар зарурати ҳамкориҳои минтақавӣ, ба вижа мавзуи Афғонистон, таъкид шудааст.

Душанбеву Теҳрон дар даҳ соли охир робитаи печидае доштанд. Тоҷикистон Эронро ба ҳимоят аз исломиёни мухолифи давлат муттаҳам мекард. Қарзи "Барқи тоҷик" аз нерӯгоҳи "Сангтӯда-2" ва сарнавишти пулҳои тоҷири эронӣ Бобаки Занҷонӣ, баҳси дигари тарафҳо буд.

Соли 2019, пас аз имзо шудани санаде, робитаҳои ду кишвар тағйир ёфт ва рӯ ба гармӣ овард.

Сафарҳои мақомдорони Тоҷикистон ва Эрон аз кишварҳои якдигар, дар моҳҳои ахир афзоиш ёфтааст.

Дар моҳи апрел вазири дифои Тоҷикистон Эмомалӣ Собирзода ва дар аввали моҳи ҷорӣ Далер Ҷумъа, вазири энержӣ ва захираҳои об, ба Эрон сафар карданд.

Вазири корҳои дохилии Эрон Искандар Муъминӣ ҳам охири моҳи гузашта аз Тоҷикистон дидан кард ва бо президент Эмомалӣ Раҳмон мулоқот намуд.

Тоҷикистон ва Эрон моҳи феврали имсол раводид барои шаҳрвандони ҳамдигарро бекор карданд. Миёни Тоҷикистон ва Эрон феълан ҳафтае се парвоз ҳаст.

Як афсари 25-солаи Нерӯҳои марзбонии Тоҷикистон дар натиҷаи садамаи нақлиётӣ дар ноҳияи Шамсиддини Шоҳин, ба ҳалокат расидааст. Ҳодисаи рӯзи 8-уми май рух додааст.

Як манбаъ аз Раёсати марзбонии вилояти Хатлон дар сӯҳбат бо Радиои Озодӣ тасдиқ кард, ки дар натиҷаи ин садама лейтенанти калон Абдураҳмони Мирзошариф, ҷон бохтааст.

Ба гуфтаи манбаъ, ҳангоми сафар ба дидбонгоҳи "Даҳана", мошини ҳомили ӯ ногаҳон аз кор мемонад ва ба ҷуқурии 200 метр сарозер мешавад.

"Лаб-лаби дарёи Панҷ сохтмони роҳ идома дорад. Дар гузашта ин минтақаҳо касногузар буд ва ҷару тепаҳои бисёр дорад. Аз самти дигар, дарёи Панҷ аст. Лейтенанти калон Абдураҳмони Мирзошариф бо як нафари дигар бо худрави тамғаи "Муссо" ба дидбонгоҳи "Даҳана", ки дар ҳамин минтақа ҷойгир аст, мераванд ва мошин аз кор мемонад. Ҳамроҳаш худро аз мошин ба берун меандозад ва ӯ ҳамроҳи мошин дар як ҷуқурии меравад, ки 200 метр будааст ва дар ҳамонҷо захмӣ шуда, мефавтад",-гуфт мусоҳиби мо.

Манбаъ афзуд, ки ҳоло тафтиши ҳодиса аз ҷониби Додситонии гарнизони ҳарбии шаҳри Кӯлоб, идома дорад.

Абдураҳмони Мирзошариф, сокини деҳаи Сармайдони ноҳияи Мӯъминобод буда, рӯзи 9-уми май дар ҳамин деҳа ба хок супурда шуд.

Яке аз сокинони деҳа рӯзи 16-уми май дар сӯҳбат ба Радиои Озодӣ гуфт, ки Абдураҳмон ҳамагӣ ду моҳ пеш издивоҷ карда буд.

Дар мавзеъе, ки садама дар онҷо рух додааст, чанд сол боз бунёди роҳ идома дорад. Чанд километр аз ин роҳ қаблан бо кӯмаки Иёлоти Муттаҳидаи Амрико сохта шуда буд.

Мақомоти ноҳияи Шамсиддини Шоҳин як сол пеш гуфта буданд, ки бо анҷоми пурраи сохтмони роҳ, назорати сарҳад комилан ба дасти нерӯҳои марзбонӣ хоҳад гузашт. Вале то ҳол маълум нест, ки сохтмони роҳ кай ба охир мерасад.

Айни замон чанд дидбонгоҳ ва отряди сарҳадӣ ба ин минтақа кӯчонида шудаанд.

Ин аввалин ҳодисаи талафоти ҷонӣ дар миёни афсарону сарбозон дар марз нест. Мақомот пештар низ аз ҳалокати хизматчиёни ҳарбӣ дар натиҷаи садамаҳои марбут ба роҳу шароити душвори кӯҳӣ ва беэҳтиётӣ, хабар дода буданд.

Хабаргузории "Рейтерз" бо такя ба манбаъҳои маҳаллӣ гузориш додааст, ки бар асари ҳамлаи нерӯҳои ҳавоии Исроил дар рӯзи шанбе, 31 фаластинӣ дар Ғазза, кушта шуданд.

Ин ҳамлаҳо дар ҳоле анҷом шуд, ки ба назар мерасад Исроил дар остонаи оғози як амалиёти густурдаи заминӣ дар ин минтақа қарор дорад.

Ба гузориши "Рейтерз" аз рӯзи панҷшанбе то кунун беш аз 300 нафар дар ҳамлаҳои ҳавоии Исроил кушта шуданд.

Артиши Исроил рӯзи шанбе эълон кард, ки дар ҳоли иҷрои амалиёти густурда ва омодасозии нерӯҳо барои густариши амалиёт дар навори Ғазза бо ҳадафи ба даст овардани бахшҳое аз ин минтақа аст.

Коршиносони Созмони Милали Муттаҳид ҳушдор додаанд, ки бо гузашти 76 рӯз аз қатъи кӯмакҳои башардӯстона аз сӯи Исроил, хатари қаҳтии ҷиддӣ ин минтақаро таҳдид мекунад.

Ба иттилои Вазорати тандурустии Ғазза, ки зери назорати гурӯҳи "Ҳамос" аст, шумори кушташудаҳои ҳамлаҳои артиши Исроил ба 53 ҳазору 10 нафар расид. Ин вазорат гуфтааст, ки 119 ҳазору 919 нафари дигар дар ҳамлаҳои Исроил дар Ғазза захмӣ шудаанд.

Гуфта мешавад, ки аксари қурбониён ва маҷрӯҳони ин ҳамлаҳо, занону кӯдакон мебошанд.

Комиссариати олии СММ дар умури паноҳандагон мегӯяд, ки дар ҳафтаи дувуми моҳи май, беш аз 4 ҳазор муҳоҷири афғон дар Покистон боздошт шудаанд.

Аммо ин идораи СММ дар бораи сарнавишти ин афрод, ки дар боздоштгоҳ ҳастанд, озод шудаанд ва ё ба Афғонистон бозгардонида шуданд, маълумоти мушаххасе ироа накардааст.

Комиссариати олии СММ дар умури паноҳандагон ҳамчунин мегӯяд, ки дар ҳафтаи дувуми моҳи май беш аз 34 ҳазор муҳоҷири афғон аз Эрон ба кишварашон бозгаштаанд.

Дар гузориши наве, ки ин идора рӯзи 16 май дар вебсайти Relief нашр кард, омадааст, ки аз оғози соли равон то 13 май, дар маҷмӯъ 507 ҳазору 300 муҳоҷири афғон аз Эрон ба Афғонистон баргаштаанд, ки аз ин миён 293 ҳазору 600 тани онҳо ба зӯр ихроҷ шудаанд.

Ҳамчунин дар як гузориши алоҳида, Комиссариати олии СММ дар умури паноҳандагон афзудааст, ки аз аввали апрел то 13 май, 186 ҳазору 200 муҳоҷири афғон аз Покистон ба Афғонистон баргаштаанд, ки беш аз 35 ҳазор тани онҳо ба таври маҷбурӣ берун карда шудаанд.

Покистон аз соли 2023 ба ин тараф раванди ихроҷи муҳоҷирони беҳуҷҷати афғонро оғоз кардааст. Аммо ин раванд пас аз эълони ҳукумати Покистон дар бораи ихроҷи дорандагони кортҳои шаҳрвандии афғон, пас аз 1 апрели соли 2025, шиддат ёфтааст.

Бар асоси гузориши Комиссариати олии СММ дар умури паноҳандагон, аз он вақт то кунун, беш аз як миллион муҳоҷири афғон ба Афғонистон баргаштаанд.

Дар ҳамин ҳол, Эрон низ дар ду соли гузашта, ҳазорон афғонистонии беҳуҷҷатро боздошт ва ба Афғонистон бозгардонидааст.

Бонки Ҷаҳонӣ эълон кард, ки Арабистони Саудӣ ва Қатар қарзҳои пардохтнашудаи Сурияро, ки ҳудуди 15,5 миллион доллар буд, баробар карданд ва Сурия ҳамакнун метавонад аз ин бонк барои бозсозӣ ва таъмини буҷа, қарзҳои нав дархост кунад.

Ин ниҳоди байналмилалӣ рӯзи 16 май эълон кард, ки Сурия аз 12 май ҳеҷ қарзи пардохтнашуда ба Анҷумани рушди байналмилалӣ (Сандуқи ин бонк барои фақиртарин кишварҳо) надорад.

Арабистони Саудӣ ва Қатар моҳи гузашта аз тасмими худ барои бозпардохти қарзҳои пардохтнашудаи Сурия ба Бонки ҷаҳонӣ, хабар дода буданд.

Бонки Ҷаҳонӣ рӯзи ҷаҳонӣ бо баёни ин ки, "Сурия пас аз солҳо даргирӣ, дар масири беҳбуд ва рушд қарор дорад", эълон кард, ки аввалин тарҳи ҳукумати нави Сурия, бар беҳбудӣ ва дастрасӣ ба барқ, равона хоҳад шуд.

Хабари баробар кардани қарзҳои пардохтнашудаи Сурия ба Бонки ҷаҳонӣ чанд рӯз пас аз эълони ногаҳонии Доналд Трамп, раисҷумҳури Амрико дар бораи бекор кардани таҳримҳо алайҳи ин кишвар, нашр шудааст.

Таҳримҳои Амрико дар вокуниш ба саркӯбҳои хунбори ҳукумати Башор Асад алайҳи эътирозгарон дар соли 2011 ва хушунатҳое ҷорӣ шуд, ки режими Димишқ алайҳи ғайринизомиён давоми ҷанги дохилии ин кишвар ба кор гирифт.

Чанд рӯз аст, ки издиҳоми азим дар назди маркази муҳоҷирати "Сахарово" дар шаҳри Маскав ҷамъ омадааст, чун то се моҳи дигар муҳлати қонунӣ кардани иқомату кор дар Русия барои хориҷиён ба поён мерасад. Мақомоти ин кишвар гуфтанд, ки ба муҳоҷирони ғайриқонунӣ чанд моҳи дигар ва то сентябр имкон медиҳанд, ки ҳузурашонро қонунӣ кунанд.

Барои ҳамин ҳамарӯза ҳазорон муҳоҷир соатҳои дароз ва гоҳо зери борону офтоби сӯзон навбат мепоянд ва баъзе бе патенту иҷозаи кору иқомат ва бо дасту пои шикаста бармегарданд.

Чандин корбари Радиои Озодӣ бо фиристодани видео аз назди маркази "Сахарово" нақл карданд, рӯзи 15-уми май дар натиҷаи талотуму бебандуборӣ пой ва қабурғаҳои чанд муҳоҷир, аз ҷумла занони тоҷик шикааст.

Аз ин пештар субҳи рӯзи 8-уми май як муҳоҷири тақрибан чилсолаи тоҷик ҳангоми навбатпойӣ дар назди "Сахарово" фавтидааст. Мусоҳибони Радиои Озодӣ гуфтанд, ӯ бемории қанд доштааст ва чанд рӯз паийҳам барои гирифтани патент меомад.

Вақте бемор аз пой афтод, касе ёрии таъҷилиро даъват накард.

Дар назди маркази муҳоҷиратии Санкт-Петербург айни аҳвол будааст. Ба хориҷиён ва бахусус муҳоҷироне, ки ғайриқонунӣ дар Русия қарор доранд, муҳлат додаанд, ки то 10-уми сентябр санадҳои худро дуруст кунанд ва ё аз ин кишвар берун шаванд.

Дар акси ҳол боздошту ронда мешаванд ва ё ҷазо мегиранд. Сабтином дар идораи муҳоҷират, пешниҳоди маълумоти биометрӣ ва пизишкӣ, шаҳодатномаи донистани забони русӣ аз шартҳои асосӣ кору иқомати қонунӣ дар Русия аст.